Páginas

18.11.16

Historias do colexio

Os vídeos forman parte da narrativa dixital, como ben sabes. Esa narrativa, ou digital storytelling en inglés, é un procedemento actual para contar historias, porque unha imaxe vale máis que mil palabras.

Nese sentido, pregunteime que historias estarían agochadas nas imaxes do colexio? Realmente non o sabía. Pero para descubrilas só hai que dar un paseo polo seus corredores e andares, ou tamén polas súa aulas, claro. Polo de agora, eu fixen o primeiro e estas son as historias que atopei…

As fotografías fixéronse coa cámara dun móbil. O vídeo foi realizado coa aplicación Quik, da mesma compañía que fabrica as cámaras GoPro, para filmar vídeos de acción. É gratis e sen publicidade, e ofrece diversas posibilidades para editar as nosas películas dun xeito rápido e sinxelo. E todo desde o mesmo teléfono.

15.11.16

Polo San Martiño

O San Martiño, ademais do tempo das castañas, tamén era o tempo dos peóns. E así pasou no noso colexio o venres 11 de novembro. O patio, durante o recreo, encheuse de nenos e nenas que practicaron o xogo popular das buxainas ou trompos. Menos mal que andaba por alí Belén Rodríguez, a profesora de Educación Física, e puido gravar o que estaba a pasar, igual que ocorreu no post anterior

9.11.16

Tempo de outono

Acabamos de celebrar no noso colexio o Samaín e a festa das castañas, o Magosto. Son as dúas celebracións que sinalan que estamos no outono e que o inverno empezará a chegar a modiño. Como as nosas compañeiras Natalia e Belén fixeron unhas bonitas fotos deses eventos, e despois prepararon con elas uns vídeos incribles, o mellor é non dicir nada máis. Porque é ben sabido que unha imaxe vale máis que mil palabras.

De Natalia López, a degustación do outono…

De Natalia López, as imaxes do Samaín…

De Belén Rodríguez, a festa do magosto…

25.10.16

Gaia

Onte foi un día triste para o planeta. Por primeira vez, desde que se rexistra o dióxido de carbono que hai na Terra, superáronse as 400 partes por millón de CO2. Este é o principal responsable do quecemento global, e unha vez que son liberadas cantidades tan grandes pasarán centos ou mileiros de anos antes de que poidan ser rebaixadas.

Para a comunidade científica, con eses niveis de dióxido de carbono o planeta entrou nunha nova era climática. As consecuencias para a humanidade poden resultar desastrosas, e o mundo que virá será moi diferente ao actual. En todo caso, e como di o científico James Lovelock, autor da Teoría de Gaia, as peores consecuencias do que temos feito entre todos serán sufridas polos nosos fillos e netos.

Si de verdade queremos conseguir unha sociedade que via en harmonía coa natureza, nalgún momento deberemos empezar a respetala máis. Por exemplo, asumindo realmente medidas como as seguintes:

  • Reciclar, reducir consumo, reutilizar.
  • Apagar o ordenador e a televisión. Aínda que Lovelock pensa que se usamos móbiles, Internet e ordenadores, utilizaremos menos o coche ou o avión, que son moito máis contaminantes.
  • Usar bombillas sostibles.
  • Usar o transporte público.
  • Reducir o uso de auga.
  • Loitar contra a perda de bosques e selvas.
  • Seguir unha dieta baixa en emisión de carbono.

21.10.16

Chega o Samaín

Chega o Samaín, e tamén o Halloween, que a palabra é o de menos. Tendo en conta o tipo de celebración que recibe, non hai referencias a este festexo na antropoloxia de Galicia. Pero o feito é que apareceu nos colexios hai algúns anos, e a cousa parece que seguirá, pois o mundo anglosaxón ten moita forza. Por iso, non é unha mala idea saber onde existen bos recursos para estes días de cabazas e bruxas…

14.10.16

Ideas para mestres en tempos de crise

Xa chegou o outono e o  tempo das castañas e o magosto. Pero aínda que a luz solar vaia a menos, iso non pode significar que ás nosas ideas tamén lles suceda o mesmo. Aquí tes unha listaxe de 13 enlaces que tratan asuntos moi diversos, desde a neurociencia ata a creación de murais dixitais. Incluso hai un deles relacionado coas viaxes, pois todo mestre sabe que son unha boa maneira de aprender, a pesar da crise…

30.9.16

Visitas a museos sen moverse da aula

Aínda que o exercicio de saír da aula e achegarse a un museo é unha gran idea, xeralmente é algo imposible, ou ben pola distancia ou por unha cuestión de horarios. Por iso, os museos con visitas virtuais son unha alternativa xenial para achegarse a todo tipo de arte e de culturas, de calquera cidade do mundo.

Grazas a Internet e ás novas tecnoloxías xa non é necesario achegarse fisicamente ao museo e pasar toda a xornada entre as súas catro paredes, descubrindo as obras que atesoura. Os museos con visitas virtuais son unha alternativa perfecta cando existen restricións que nos impiden visitalos na realidade.

Desde Educación 3.0 propóñennos unha selección de 10 museos con visitas virtuais para que poidamos percorrer os seus corredores e descubrir todo o que poden ensinarnos. Ademais, cunha aplicación adecuada, as tabletas (e incluso os móbiles) poden converterse nunha guía para explorar as principais obras mestras dos diferentes museos do mundo.